東周刊 eastweek.com.hk : Paco巨星飯堂 – 活化傳統

1_n

東周刊 eastweek.com.hk : Paco巨星飯堂 – 活化傳統

活化傳統

中國人要食得矜貴又滋陰補身,傳統嚟講都離不開鮑參翅肚,加埋冬蟲草就補上加補。但係稱得上矜貴,價錢亦未必夠親民,我就欣賞今晚「Paco巨星飯堂」嘅3位嘉賓,能夠活用科技,現代化零售海味,一門喺一般人眼中較古老嘅生意。佢哋就係葉澍堃幼子葉瀚華(Ian)、已為人妻嘅「女神」陳爽(Sherry),仲有陳爽丈夫梁梓軒(Anthony),今晚我哋去到位於灣仔嘅「星記海鮮飯店」,品嘗Anthony同Ian代理嘅珍貴海味,再細味餐廳嘅招牌菜式。

今晚我同爽爽(左)、Ian(右),仲有爽爽丈夫Anthony去到灣仔「星記」,品嘗「觀頤」有售嘅高質海味,頁內介紹嘅菜式,原料要到「www.gycollagen.com」睇詳情。

手持巨型魚肚嘅老闆娘,係最佳生招牌。

組兄弟班

3位年輕人喺2014年就開始合作,創辦「觀頤骨膠原專門店」,主打網上市場,銷售參茸海味。喺欣賞佢哋嘅創意之時,我從店名亦睇到佢哋不離傳統文化嘅地方。Ian話:「其實係八卦中嘅卦象,有『觀其所養』嘅意思,好啱我哋嘅宗旨。我哋以花膠做主打,喺網上賣除咗方便年輕一輩之外,冇舖租去限制成本,所以我哋嘅價錢可以比市面低最少一成。

「我同Anthony係大學同學,識咗好多年,佢已經係第三代人做批發海味,有好好嘅connection喺世界各地直接入貨,我哋就將呢個長處伸展,賣海味係第一步,o依家喺上環開埋showroom,畀啲鍾意睇實貨嘅客去睇貨,我哋慢慢再教人點食可以既養顏又補身,集美容、保健於一身。」

兄弟組班,加上「阿嫂」爽爽,看似理所當然,但爽爽表示,Ian其實係佢哋夫婦嘅媒人。「我因為之前拍TVB嘅節目識Ian,有次佢約我食飯,同場就係我老公同埋Ian哥哥。哈哈!」

冬蟲草燉水鴨,冬蟲草來自西藏曲那,矜貴又滋陰。

關東刺參及網鮑,前者質素比關西刺參高,惟價錢亦較高。

鱸魚肚價錢相宜,又具質感,今晚我試嘅炆花膠已show晒quali。

甜品係椰汁燉燕窩,選用嚟自印尼嘅野生金絲燕,養顏最啱。

夫婦同心

緣份令爽爽冠上Anthony姓氏,亦令生於中醫世家嘅爽爽,發揮賢內助本色,令生意更有聲有色。「我有好多嘢都係邊做邊學,好似唔同嘅食效,花膠滋補,網鮑就滋陰,刺參就有高鈣質同氨基酸。相比之下,我會主力推介啲貨畀朋友多啲,建立口碑亦都好重要。如果有朋友唔識發花膠,或者其他海味,我都會盡量幫佢哋發埋,長遠嚟講,多嘅話未必做到,但係我都會教埋佢哋。」

Anthony就話:「因為我哋對自己嘅來貨質素好有信心,但係為咗控制成本,所以先從朋友開始,贏咗口碑再逐步發展,我同Ian都有做開business management,知道呢門生意要逐步嚟。發展一站式服務,係其中一個方法。」

夫婦同心,爽爽仲做埋生招牌添。「係自己落手落腳先真,我試過喺屋企點貨,有300幾塊鱸魚肚,我自己都係食嗰隻,$2,000幾蚊一斤,用嚟煎或者炆都得,今晚我哋都係食呢種魚肚。」

爽爽同Ian表示,過年前要喺爽爽家中加班,為海味進行包裝工作,個個都親力親為。

Anthony同爽爽二人同心,加上好兄弟Ian,生意以外,早前慧妍雅集籌款,佢哋都捐出名貴花膠進行拍賣,支持善舉。

為咗做功課,爽爽喺訪問時化身攝影師。

大廚(右二)為我哋炮製多款餐廳招牌菜式,名不虛傳!

我同爽爽(右三)一見面,佢已表示仍然記得7年前同五月天一齊擔任我嘅專欄嘉賓。

補得其所

講起花膠,爽爽就繼續分享:「之前我有食白花膠補身,生BB前後都有燉嚟食,嗰隻花膠近乎零脂肪,又冇腥味,對長胎好有幫助。有謬誤話媽媽餵母乳,食花膠會影響谷奶,但花膠其實有豐富嘅膠原蛋白,會提升母乳嘅質素先真。」

因為現時仍然係爽爽、Ian同Anthony嘅拼搏期,Ian都有sell爸爸葉澍堃。「Daddy就要試咗啲質素先會介紹畀佢嘅朋友,佢話我哋啲貨都唔錯,我唔方便開名嘅,不過政界、商界同演藝界都有佢嘅朋友嚟買,之後仲成為常客。」

哈哈哈!喺傳統上加上貼心配套,我預祝3位年輕人嘅生意愈做愈好!

椒鹽鮮魷($108/例),香脆!

椒鹽九肚魚($88/例),最啱佐酒。

雲耳勝瓜浸豬膶($88/例),豬膶軟滑,準備工夫做得出色!

鳳梨生炒骨($95/例),醬汁屬秘製,令人回味無窮。

星記海鮮飯店

地址:灣仔盧押道21-25號The Pheonix 3樓

電話:2528 9028

Share this article

About admin

You May Also Like

免責聲明:本網站及其內容是為網上購物服務之客戶使用,閣下一經使用本網頁或網頁的任何部份,即表示閣下已知悉有關免責聲明,並且不可撤回和無條件地接受及同意受其約束。同時,我們有權不時作出修改,增加或刪除該等條款或本網站其他資料(包括但不限於產品的價格,規格和質量),而無須預先通知用戶。在任何情況下,因使用或未能使用本網站,或本網站的資料有任何錯誤或遺漏,以致閣下或任何其他人士蒙受任何直接或間接的損失(包括但不限於電腦病毒、系統故障、資料損失、維修或更換而引致的財產、材料、工具或數據的損失),本網站不會向用戶承擔任何責任。本店售賣的產品多位有機食物,顧客簽收時必須清楚查看貨品質量及以適當的方式儲存,產品一經簽收后恕不退換。

Copyright © 2014 Guanyi Collagen Specialist Ltd, All Rights Reserved